موضوع: ايجى الليل ويلتمن امعاه افكارى....للشاعر منعم قصله الثلاثاء أغسطس 17, 2010 5:55 pm
للشاعر منعم قصله..
ايجى الليل ويلتمن امعاه افكارى .... ونجبد اللى عالناس فيه انوارى
ايجى الليل ويكدرنى ... ويخطر قديم بسيته يقهرنى هذيك لوله هلى ابها دردرنى ... كلانى بنار وما كلاته نارى والقيته على بكيه الها جابرنى ... وامحوس العقل وحايسات انظارى ووين قابلت فيا بعيد دفرنى ... وما عاد قابل من جفاه عذارى وتغير امعاى امغير ما غيرنى .... قديم ما انسلم فيه كيف عقارى
ايجى الليل ويلتمن امعاه افكارى .... ونجبد اللى عالناس فيه انوارى
با ليل فيك احكايا .... تخطر بعد غفوت الناس هنايا فى نومها وانا يزيد كدايا .... وانت اللى عارف جميع اسرارى وعارف الحال ومن سبايب دايا ... وعارف ابكايا فيك كيف نهارى وعارف اللى مدفون فى جوايا .... امفيت انت ما والى ابهمى دارى مللى نارهم شايل بلا وقايه ... وفوق حملى شلت حمل اجبالى خلولى امواجع قاعدات امعايا ... فى وسط قلبى حارقات استارى اقدم فى رجاهم شبت طال رجايا ... ومن طول الرجا بانن اليوم عوارى وحتى من قليل العرف والهزايا ... حامل سواياهم وماهم كارى وحتى الوقت متعاكس اعبى بعبايا .. دبر على وشوف يا دبارى وكثرن اهمومى جايات ورايا ... ووين ما انبرم جاييات اصدارى طال السهر عندك وطال ابكايا ... وطال الرجا فيهن وطال جذارى
ايجى الليل ويلتمن امعاه افكارى .... ونجبد اللى عالناس فيه انوارى
يا ليل فيك ايجونى .... غوالى اقدم بفراهم لاعونى حتى انكان فى حقى اليوم كلونى ... اعزاز ردتم ما زلت فى تيارى لقصى امعادى والقريب الدونى ... وعلى شانهم حامل الجرح الزانى وديتهم امغير بود ما ودونى ... باعوا غلاى ونا غلاهم شارى واقدم فى رجاهم لولى يلقونى .... انكان عاودو ما زلت ماسك دارى
ايجى الليل ويلتمن امعاه افكارى .... ونجبد اللى عالناس فيه انوارى
ليل الليل وجانى ... وسرحبى خيالى للبعيد خذانى وضاق علم عندى من هموم زمانى ... وجا الكيد عالبكيا عليك مطارى وكل حى عنده فالحياه تمانى ... زانا احلامى عاكسن فسارى بظروف وقت متشبر عزيز لوانى ... ومالبخت تمن نازحات ابيارى وامعا جروح خلانى قديم انعانى ... امصيفات فى عز الربيع قرارى
ايجى الليل ويلتمن امعاه افكارى .... ونجبد اللى عالناس فيه انوارى
ايجى الليل نسمر بيهن .... امواجع غوالى خاطرى كاميهن وما من اهموم يسمرن خاطيهن ... ياالعين فيه الهم ماتختارى وعندى سوايا داسهن ناسيهن .... امعا الليل نفتش فى خبر متوارى وكثرن على حست ما نبيهن ... دسايس ايجيبن فى ابعاد الطارى ونقعد على عقلى انوازى فيهن ... امعا لولات وفالزمان الجارى
ايجى الليل ويلتمن امعاه افكارى .... ونجبد اللى عالناس فيه انوارى
تحياتي ليكم
ايجى الليل ويلتمن امعاه افكارى....للشاعر منعم قصله
